Fagor Ederlan kooperatibak erreferente izaten jarraitzen du iraunkortasunaren alorrean, eta haren ahalegina aitortua izan da zenbaitetan. Oraingoan, ASI ziurtagiria jaso du: errendimendu estandarraren V3.1 maila. Zehazki, presio altuko eta baxuko trokelgintzako galdaketa erabiliz automobilgintzarako aluminiozko osagaiak -motorren karkasak, motor blokeak, transmisio karkasak, olio zartaginak…- fabrikatzeagatik izan da aitortua. Horrekin, aluminioaren alorrean duen posizioa indartu du Fagor Taldeko kooperatibak.
Fagor Ederlanek urteak daramatza iraunkortasunaren alorrean pausu garrantzitsuak ematen. Tartean, duela hilabete gutxi, zilarrezko domina jaso zuen jasangarritasunean eta erantzukizun sozial korporatiboan aintzatespen handiena duen Ecovadis ebaluazio sisteman, 2025ean zehar egindako lana aitortuz. Zehatz esanda, 70 puntu lortu zituen, eta, horrekin, hobetu egin zuen ordura arteko puntuazio globala.
CDPen aitortza
2024an, ingurumen gardentasunean erreferente den CDPek (Carbon Disclosure Project) ekintza klimatikoan inplikatuta dauden enpresen artean jarri zuen Fagor Ederlan. Hornikuntza-kate guztiaren bidez aldaketa klimatikoaren kontrako lanean konprometituenak diren enpresak barnebiltzen dituen mundu mailako aitortza da.
Fagor Taldeko kooperatibak merkatuan duen posizioa indartzen dute errekonozimendu horiek guztiek, eta lan-aukera berriak zabaltzen dizkio. Fagor Ederlanek langileen eguneroko lanaren aitortza moduan jaso du errekonozimendua: “Oso harro gaude horrelako ziurtagiri eta errekonozimenduak jasotzeagatik, hein batean, gure langileek egunerokoan egiten duten lana aitortzen delako. Gainera, iraunkortasunaren alde egina dugun apustua berresten dute”.
