Skip to main content

Berrikuntzan eta iraunkortasunean egina duen apustua berretsi du Fagor Ederlanek 2022an. Besteren artean, ingurumen inpaktua mugatzeko edota pisua murrizteko, materialen birziklagarritasunerako eta hondakinen baloraziorako teknologia berriak garatzera bideraturiko aurrekontua indartu du kooperatibak. Orotara, 7,5 milioi euroko aurrekontua du aurreikusirik -Eusko Jaurlaritzak eta SPRIk bultzaturiko programen babesa jaso duten hamabi plan ditu aurkezturik-.

Hainbaten artean, haren lan lekuen ingurumen inpaktuari begirako ekintzak ditu martxan jarriak Fagor Ederlanek. Eta ISO 14001 ziurtagiria eskuratzeko jardun du lanean azken urteotan. Horretan geratu barik, sei proiektu ditu aurkezturik Eusko Jaurlaritzak ingurumenaren babeserako dituen laguntzetara -guztira, 5,3 milioi eurokoa da horien aurrekontua-, eta 0,7 milioi euroko laguntza du jasoa -aurrekontu osoaren %13-.

Plan horien bidez, ingurumen inpaktua murrizteko ekinbideak abiaraziko ditu Fagor Ederlanek Bergarako aluminio galdategian (gasen trataerarako sistema eta tratamendu termikoa), Arrasateko burdin galdategian (emisio bilketarako linea), Eskoriatzako burdin galdategian (amina eta karbono organiko partikulentzako iragazkiak), Eskoriatzako aluminio galdategian (taladrinak iragazteko sistema zentralizatua eta txirbilen trataerarako sistemak) eta Usurbilgo burdin galdategian (amina eta karbono organiko partikulentzako iragazkiak).

Ostera, efizientzia energetikorako, materialak berrerabiltzeko eta hondakinei balioa emateko planekin dabil Fagor Ederlan. Besteak beste, Hazitek 2022ko partaide da, eta Burdint, Sopol, Paeram, Hicore, Deskar30 eta Semfem planetan dabil parte hartzen, orotara, 2,3 milioi euroko aurrekontuarekin. Era berean, efizientzia energetikora bideraturiko Etekina moduko programekin dabil. Halakoekin, hondar-beroaren aprobetxamendua handitzeko, ingurumen aztarna murritzeko osagai urtuen ekoizpenerako eta eraikuntza materialetan hondakinen balorizazioan eragiteko bitartekoak bilatzen dira.

Aztarna murrizteko lanean

2020an eta 2021ean karbono aztarna neurtu ostean, hura murrizteko ekinbideekin dabil Fagor Ederlan -946.481 tCO2eq igorri zituen 2020an-. Besteren artean, buru-belarri dabil lanean haren galdategietako materialen birziklagarritasuna handitzeko, osagaien pisua murrizteko, bizi zikloa hobetzeko, efizientzia energetikorako, zorroztasuna handitzeko eta hornikuntza katean iraunkortasun politikak sartzeko. Gainera, energia berriztagarrietan sakontzen ere badabil Fagor Ederlan.