Fagor Arrasatek eta Butech Blissek lankidetza akordioa sinatu dute gaitasunak batu eta munduko merkatuei bobina-prozesuei (coil-processing) loturiko soluzio aurreratuak eskaintzeko. Oro har, Fagor Taldeko kooperatibaren ingeniaritza-esperientzia globala, automatizazio-teknologiak eta coil‑processing soluzioak, eta Butech Bliss enpresa estatubatuarraren presentzia lokala, exekuzio‑ahalmena eta bizi‑zikloko zerbitzuaren bidez Ipar-Amerikan eskaintzen duen bide laguntza sendoa uztartuko ditu akordioak. Horrenbestez, aurrerantzean bat eginik izango dituzte lidergo teknologikoa eta zerbitzuetako egitura lokala; eta horrek ahalbidetuko die AEBetako bezeroei soluzio osoagoak eskaintzea.
Fastr biltegi robotizatua
Metalak eraldatzeko eta prozesatzeko ekipamenduen hornitzaile globala da Fagor Arrasate. Besteren artean, luzetarako ebaketa-lineak, prentsa‑sistemak, automatizazioa eta ekoizpen integraturako teknologia aurreratuak eskaintzen dizkie automobilgintzaren, etxetresna elektrikoen, metal‑prozesaketaren eta bestelako industria sektoreetan diharduten enpresei. Lankidetza akordioak, luzetarako ebaketako lineetako zizailaren ebaketa tresnak automatikoki konfiguratzeko Fagor Arrasatek sorturiko Fastr biltegi robotizatua du erdigunean, segurtasuna, koherentzia eta eraginkortasuna hobetzeko diseinatutako sistema aurreratua, alegia. Zehatz esanda, soluzio eskaintza zabal baten barruan eskainiko da, eta linea berrietan zein dagoeneko eginak dauden instalazioetan da aplikagarri, jatorrizko fabrikatzailea edozein dela ere.
Gainera, akordioari esker, Butech Blissen scrap‑chopper eta stretch‑leveler ekipoak barnebilduko ditu Fagor Arrasateren eskaintza globalak. Are: salmentara mugatu barik, horiei loturiko zerbitzuak, ordezko piezen merkaturatzea eta birgaitze‑laguntza eskainiko ditu. Era berean, AEBetan zenbait ordezko pieza fabrikatu eta zerbitzua lokalizatzeko aukerak aztertzen ari dira bi enpresak. Horrek, Fagor Arrasateren egungo zerbitzu‑sarea Butech Blissen field‑servicerekin osatzea lekarke, eta, beraz, bezeroei bizi‑ziklo osoko laguntza eta erantzun‑denbora azkarragoak eskaintzea.
Soluzio aurreratuen aplikazioa
Mikel Lopez Guerra Fagor Arrasateko siderurgia negozioko zuzendariaren hitzetan, Fagor Arrasateren ingeniaritza eta automatizazio gaitasun globalak tokiko exekuzioarekin eta laguntzarekin uztartzea ahalbidetuko die sinatu berri duten akordioak. “Horri esker, bezeroak konfiantza osoz aplikatu ahal izango dituzte luzetarako ebaketako soluzio aurreratuak”, gaineratu du. Hainbaten artean, teknologia esklusiboak, coil‑processing arloko aplikazio‑esperientzia sakonak eta Ipar Amerikan oso errotua duen zerbitzu‑antolaketa ditu Butech Bliss enpresak.
Jock Buta Butech Bliss enpresako CEOarentzat ere aberasgarria da akordioa: “Lankidetza honek aukera ematen digu gure egungo soluzioak Fagor Arrasateren teknologiekin osatzeko, bezeroei errendimendua hobetzeko aukera zabalagoa eskainiz, jada konfiantza duten ingeniaritza eta zerbitzuaren bidez”. Enpresa estatubatuarrak urteetako ibilbidea du aplikazio zerrotzenetako coil‑processing sistemen diseinuan, garapenean eta mantenuan.
