Aurreko urtearen ildo beretik joan da 2024a; salmentei eta emaitzei eutsi diegu, eta 76 milioi euroko irabazi kontsolidatuak izan ditugu. Finantza ratio nagusiek ere hobera egin dute, Taldeko kooperatiben sendotasun finantzarioaren erakusle.
Gure kooperatibentzat garrantzia handia duten zenbait sektore, automozioa kasu, eraldaketa prozesu sakon batean daude murgilduta, eta guri ere aldaketa horietara egokitzea tokatzen zaigu.
Aldaketa haizeak nagusi diren testuinguru ekonomiko horretan, 2021. urtean onartutako Fagor 2030 iraunkortasun estrategia garatzen jarraitu dugu, eta aurrerapauso esanguratsuak eman ditugu zenbait alorretan.
Besteak beste, 300.000 euroko ekarpen berria egin diogu gure ehun industriala eraldatzea helburu duen Hirekin berrikuntza eta ekintzailetza zentroari. Rol garrantzitsua jokatuko du gure negozio eta produktuak etorkizuneko ekonomia digital eta zirkular baten testuingurura egokitu ahal izateko.
Fagor Etxetresnetako bazkide ohien kontsolidazio prozesuarekin jarraitzen dugu, eta kolektibo horri behin betiko irtenbidea eskaintzeko gure konpromisoa berresten dugu. 41 kontsolidazio berri egin ditugu aurten. 2013tik, 454 ditugu eginak.
Gure karbono aztarna murrizteko lanarekin ere jarraitu dugu. Tartean, 2024an izan dugun energia kontsumo osoaren %67 berriztagarria izan da.
Era berean, balioan jarri behar genuke Fagorrek gizarteari egiten dion ekarpena. 2024. urtean zehar ia 3 milioi euro bideratu ditugu gure Gizarte funtsetik hainbat gizarte ekimenetara. Diru ekarpenetik haragoko konpromisoa dugu, gainera.
Azkenik, memoria honetan jasotzen den guztia posible izan dadin Fagorreko kideek egiten duten ekarpena balioan jarri eta eskertu nahi nuke. FAGOR, marka bat izatetik harago, pertsona talde zabal eta anitz baten proiektua baita.
Agur bat.
Joxean Alustiza Usandizaga
Fagor Taldeko presidentea
